हेटौंडा । बागमती प्रदेशका मुख्यमन्त्री शालिकराम जम्कट्टेलले राष्ट्रियता, लोकतन्त्रको जगेर्ना गर्दै सङ्घीयताको सबलीकरण र गणतन्त्र सुदृढ गर्न एकताबद्ध भई सफल एवम् समुन्नत राष्ट्र निर्माणमा अघि बढ्न प्रेरणा मिल्ने विश्वास व्यक्त गरेका छन । राष्ट्रिय प्रजातन्त्र दिवस, २०८० को अवसरमा शुभकामना सन्देश जारी गर्दै उनले संविधानको मर्म र भावना अनुसार सामाजिक सद्धभाव कायम गरी अगाडि बढ्नुपर्नेमा जोड दिए ।
विगत सात दशक यताका सबैखाले संघर्ष र आन्दोलनहरुबाट प्राप्त उपलब्धिहरुको साँचो अर्थमा कार्यान्वयनको चरणमा रहेको जिकिर गर्दै यसको विकास, विस्तार र सुदृढीकरणको प्रक्रिया निरन्तर चलिरहनु अनिवार्य रहेको उनले बताए । प्रजातन्त्रलाई संस्थागत गर्नका लागि संविधान सभाबाट लोकतान्त्रिक गणतन्त्रात्मक संविधान जारी भएसंगै लामो राजनीतिक सङ्क्रमणकाल समाप्त भईसकेको सन्दर्भमा मुलुकको आर्थिक, सामाजिक, रूपान्तरणसहित आमजनताको जीवनस्तर सुधार गर्ने लक्ष्यकासाथ गठन भएको बागमती प्रदेश सरकार, बागमती प्रदेशको विकास र समृद्धिका लागि दृढ रहेको विश्वास उहाँले दिलाए ।
जहानियाँ, निरङ्कुश शासनविरूद्ध बलिदानीपूर्ण संघर्षको परिणामस्वरूप वि.सं. २००७ सालको आन्दोलन सफल भए पश्चात आधारभूत मानवअधिकारको वहाली भई नेपाली जनताले राजनीतिक स्वतन्त्रता हासिल गरेको ऐतिहासिक उपलब्धिको सम्झना र सम्मान स्वरूप प्रत्येक वर्ष फागुन ७ गते मनाउने राष्ट्रिय प्रजातन्त्र दिवस तथा लोकतन्त्र प्राप्तिका लागि भएका सबैखाले संघर्षका क्रममा घाइते, अपाङ्ग हुनुभएका र तत्कालीन राज्यबाट बेपत्ता पारिनुभएका सम्पूर्ण योद्धाहरुको अमूल्य योगदानको मुख्यमन्त्रीले स्मरण गरे ।
दिवसको अवसरमा स्वदेश विदेशमा रहनुभएका सम्पूर्ण दिदीबहिनी तथा दाजुभाइहरूमा सुख, शान्ति र समृद्धिको कामनासहित शुभकामना व्यक्त गर्दै देशमा लोकतन्त्र प्राप्ति एवम् राष्ट्रियताको संवर्द्धनका लागि विभिन्न समयमा भएका संघर्षहरुमा जीवन आहुति दिनुहुने महान् सहिदहरुप्रति उहाँले भावपूर्ण श्रद्धाञ्जली व्यक्त गरे ।
प्रतिक्रिया दिनुहोस्